Posted: 06/14/2012 03:13 PM IST

ఐశ్వర్యారాయ్, కత్రినాకైఫ్, ప్రియాంక చోప్రా, బిపాసా బసు... సయాలీభగత్, గీతా బాస్రా, ముగ్ధాగాడ్సే, జియాఖాన్.. ఈ తారల బాలీవుడ్ రంగప్రవేశానికి ముందు జీవితాన్ని పరిశీలిస్తే ఓ సారూప్యం మనకు తెలుస్తుంది. అదేమంటే వీరందరూ మోడలింగ్ రంగం నుంచి బాలీవుడ్‌కు పరిచయమైనవారే. వీరిలో తొలి నలురిని ఇప్పటికీ బాలీవుడ్ అగ్రకథానాయికలుగా చెప్పుకుంటున్నారు. మిగతావారికి సరైన అవకాశాలు రాకున్నా ఇంతో అంతో గుర్తింపు పొందారు. ఇప్పుడు ఇదంతా ఎందుకంటే... బాలీవుడ్‌కు రావాలన్న కోరిక ఉన్న ప్రతిఒక్కరూ ముందుగా మోడలింగ్‌ను కెరీర్‌గా ఎంచుకుంటున్నారు.

నటించాలనుకున్నప్పుడు యాక్టింగ్ స్కూల్స్‌లో చేరొచ్చుకదా? అని వారిని ప్రశ్నిస్తే... ఇప్పుడున్న బాలీవుడ్ తారల్లో చాలా మంది మోడలింగ్ రంగం నుంచి వచ్చినవారేనని, అగ్రనాయికలుగా చెలామణి అవుతున్న వారు కూడా ఆ తాను ముక్కలేనని, మేము కూడా మోడలింగ్ రంగంలోకి వస్తున్నది బాలీవుడ్‌లోకి రావాలనే కోరికతోనేనని చెబుతున్నారు. ఈ విషయమై వర్ధమాన మోడల్ అలేసియా రౌత్ మాట్లాడుతూ... ‘బాలీవుడ్‌లో పాత్రల పరిధి ఎప్పటినుంచైతే పెరిగిందో అప్పటి నుంచి మోడల్స్ నటులుగా మారిపోతూనే ఉన్నారు. ప్రస్తుతం మోడల్ రంగంలో కొనసాగుతున్నవారందరూ బాలీవుడ్ అవకాశాల కోసం ఎదురుచూస్తున్నారు.

ఆ సినిమా పెద్ద నిర్మాణసంస్థకు చెందినదా? చిన్న సంస్థ ఆ సినిమాను నిర్మిస్తోందా? చిత్రంలో తన పాత్రకు ప్రాముఖ్యత ఉందా? లేదా? అనే విషయాలను పక్కనబెట్టేస్తున్నారు. బాలీవుడ్‌లో అవకాశం వచ్చిందంటేచాలు వెంటనే అంగీకరిస్తున్నారు. అందుకు కారణం కూడా లేకపోలేదు. మోడలింగ్ రంగం పరిధి బాలీవుడ్ అంత విస్తృతమైనది కాదు. పైగా ఆ రంగంలో ఎక్కువ కాలం కొనసాగలేం. ఎప్పటికైనా మరో అవకాశం కోసం ప్రయత్నించాల్సిందే. అలాంటప్పుడు బాలీవుడ్‌నే ప్రత్యామ్నాయంగా ఎంచుకుంటే తప్పేంటి? హీరోయిన్‌గా, ఐటమ్ గర్ల్‌గా, సహాయక న టులుగా చాలా కాలం కొనసాగే అవకాశం బాలీవుడ్‌లో ఉంటుంది. అందుకే మోడల్స్ బాలీవుడ్‌ను మోడలింగ్ అనంతరం కెరీర్‌గా ఎంచుకుంటున్నార’ని చెప్పింది.